OFFICIAL STATEMENT OF HON. MAYOR AMADO CANDIDO
Ha akon mga tinahod nga mulopyo han Hernani:
Dako an akon pagpapasalamat han iyo mga pag-ampo para han akon panlawas ngan han dagmit nga pakarecover tikang hini nga akon ginkakaatubang yana nga sakit. Dako gihap an akon pasasalamat han ngatanan nga nagpaabot han ira pangumusta ngan pagpapaabot hin mga mensahe hin kaupayan.
Ha pagkayana, aadi ako nag-iisolate ngan hinay-hinay gihapon nga nagrerecover. Naupay-upay na gihapon an akon pan-abat. Diri gud ako nahuhulop hini nga kabutangan kay maaram ako nga aada kamo nga akon makakabakyang ha pag-atubang hini yana nga kamutangan.
Komo Amay han Bungto, nakikita ko nga an hulga hini nga Covid ha yana nga panahon hin pandemya in kaapi han pagserbisyo ha iyo. Ha luyo hini nga hulga, nagpapadayon an aton pagserbisyo ha aton mga mulopyo kutob ha aton makakaya, dako nga salamat han mga nakakabakyang ko liwat nga aton mga empleyado han munisipyo.
Tikang yana, magpapadayon gihapon ako pagpaabot han akon pagserbi ha iyo, kabulig an aton mga frontliners nga empleyado han munisipyo, tikang didi ha akon isolation, kumo iyo Amay han Bungto.
Hini nga aton kamutangan nagpapahinumdom gihapon ha aton ngatanan yana nga padayon kita nga mahugot nga magsunod han mga iginmamando ha aton nga public health standards nga asya an padayon nga pagsul-ot han face mask, face shield, pagsunod han social distancing, pagdisinfect han kamot gamit an alcohol o hand sanitizer ngan/o panhunaw.
Kaupod an waray pagpapas niyo nga pagsuporta, pag-ampo, pagpaupay han panlawas, ngan pahuway, natapod ako nga malalakbayan ko ini nga kamutangan ngan ha dagmit nga panahon makakabalik ha pagserbisyo ha iyo tikang dida ha munisipyo.
Utro, damo nga salamat ngan mapadayon kita pag-uswag, Hernani.
Source Credit: Mayor Amado De Lira Candido
Recent Comments